Naturalytingar

🔗Verdi på naturalyting

Hovudregelen er at alle fordelar ein arbeidstakar får er skattepliktige.
Arbeidsgivaren skal ta med verdien av skattepliktige naturalytingar i utrekningsgrunnlaget for forskotstrekk og arbeidsgivaravgift. Det er ikkje alltid like enkelt å finne verdien på ei naturalyting. I utgangspunktet skal omsetningsverdien leggast til grunn. Av praktiske årsakar er det i nokre tilfelle gitt alternative måtar å verdsetje verdien på ytinga.

Verdsetjing av naturalytinga kan skje på tre måtar:

• Etter sats
• Arbeidsgivar si fastsetting
• Skattekontoret si verdsetting

Eksempel på skattepliktige naturalytingar:

• Fri bil
• Mobiltelefon/internett
• Fri kost og losji
• Privat bruk av bonuspoeng tente opp i jobbsamanheng
• Rimeleg lån i arbeidsforhold
• Personleg medlemskap på treningssenter

Det er likevel gitt skattefritak for enkelte typar naturalytingar.

🔗Nokre skattefrie naturalytingar

Jubileumsgåver

I utgangspunktet er gåver til tilsette skattepliktige, men det finst nokre unntak:

• Gåve på inntil kroner 8 000 for lang tenestetid kan bli gitt skattefritt til tilsette. Gjeld første gong ved 20 års tenestetid, og deretter kvart tiande år.

• Gåve på inntil kroner 4 000 kan blir gitt skattefritt til tilsette når:

a) mottakaren giftar seg

b) mottakaren fyller 50 år og deretter kvart tiande år

c) mottakaren går av med pensjon eller sluttar av annan grunn etter minst 10 år i bedrifta 

d) bedrifta har bestått i 25 år eller i tal år som er deleleg med 25, for eksempel 50 år

Andre gåver: 

• Gåve til dei tilsette inntil kroner 5 000 per år kan bli gitt skattefritt (for eksempel julegåve).

Det er ikkje lov å gi gåva i form av kontantar. Eit gåvekort som ikkje kan vekslast inn i pengar vil likevel bli godtatt.

🔗Personalrabatt

Personalrabatt, medrekna 100 prosent rabatt, på uttak av varer og tenester som verksemda produserer eller sel, er ikkje skattepliktig så lenge den samla rabatten per tilsett ikkje overstig kroner 10 000 per år. Rabattar som ein tilsett får via arbeidsgivaren sine leverandørar skal også vere tatt med i den samla rabatten. Det er omsetningsverdien i sluttbrukarmarknaden som skal leggast til grunn ved utrekning av verdien på rabatten.

Når reglane om personalrabatt og reglane om skattefri gåve blir kombinerte, inneber det at arbeidsgivar skattefritt kan gi verdiar for inntil kroner 15 000 per tilsett per år. Skattefrie jubileumsgåver kjem i tillegg.

Forskjellen mellom reglane om personalrabatt og gåveregelen er at det for gåveregelen ikkje er noko vilkår om at varet eller tenesta må omsetjast i arbeidsgivarverksemda.

🔗Bankkort/kredittkort

Dersom arbeidstakaren reiser i jobben eller på annan måte har bruk for eit bankkort eller kredittkort i arbeidssamanheng, er det ikkje skatteplikt for fordelen ved at arbeidsgivaren heilt eller delvis dekker årsavgifta.

🔗Rimelege velferdstiltak

Naturalytingar som kan reknast som "rimelege velferdstiltak" for alle eller ein betydeleg del av dei tilsette, blir ikkje rekna som skattepliktig inntekt. Eksempel på dette kan vere ei felles tilstelling med formål å auke trivselen på arbeidsplassen.

🔗Bedriftshytte

Dersom hytta er tilgjengeleg for alle tilsette, eller ei betydeleg gruppe tilsette, og desse har lik rett til å bruke denne vil dette normalt vere eit skattefritt gode for den tilsette. Er bruken av bedriftshytte i hovudsak atterhald eigarane til bedrifta eller eit fåtal tilsette, vil fordelen vere skattepliktig.

🔗Overtidsmat

Arbeidsgivaren kan skattefritt dekke eit måltid på inntil 200 kroner når den tilsette arbeider minst 10 timar samanhengande. Dette føreset at arbeidsgivaren kjøper maten, eller at arbeidstakaren dokumenterer kostnaden med kvittering.

🔗Fri avis

Privat tilgang til aviser eller nyhetstenester dekt av arbeidsgivaren blir ikkje rekna som skattepliktig for den tilsette når det ligg føre tenstleg behov (blir rekna som nødvendig på grunn av arbeidet sitt) for det.

🔗Klede

Når arbeidsgivaren kjøper inn og krev at den tilsette skal bruke uniform eller spesielle verneklede, er det ikkje skatteplikt for arbeidstakaren.

Uniformer er kjenneteikna med at dei har eit einskapleg utsjåande og uniformsmessig preg, gjerne med logo på, og at dei er lite eigna til privat bruk.

Verneklede blir gjerne bruka på grunn av stor slitasje, smuss eller hygieniske årsaker. Eksempel på dette kan vere kjeledressar på bilverkstadar eller overtrekksfrakkar i helsevesenet.

🔗Naturalytingar og arbeidsgivaravgift

Er ei naturalyting skattepliktig for mottakaren og dermed inngår i grunnlaget for forskotstrekk, må arbeidsgivaren rekne ut og betale arbeidsgivaravgift for beløpet. Kan naturalytinga utbetalast skattefritt for mottakaren, skal heller ikkje arbeidsgivaren betale arbeidsgivaravgift.

🔗Lønnsopplysningsplikt (lønnsrapportering)

Alle skattepliktige naturalytingar skal rapporterast til myndigheitene gjennom  a-meldinga. Naturalytingar som er skattefrie treng du ikkje å rapportere.

🔗Kontakt og hjelp: