Music Norway sitt arrangørtilskot
Tilskot til å gjennomføre arrangement i Noreg som fremjar profesjonelle aktørar i norsk musikkbransje internasjonalt.
Formålet med ordninga er å auke etterspurnaden, marknadsverdien og nettverket til norske aktørar i musikkbransjen internasjonalt.
Kva kan du søke stønad til?
Det kan søkast tilskot til å gjennomføre arrangement i Noreg som fremjar norsk musikk i utlandet, som presse- og ekspertbesøk frå utlandet og låtskrivar-samlingar for norske og utanlandske låtskrivarar.
Presse- og ekspertbesøk
Det kan søkast om utgiftsdekking til deltaking av internasjonal presse, bransjeaktørar og internasjonale kjøparar ved eit konkret arrangement i Noreg, som kan ha betydning for ein internasjonal karriere.
Det kan søkast om tilskot til delfinansiering av reise og overnatting for internasjonal presse eller bransjeaktørar til eit arrangement i Noreg.
Låtskrivarsamling
Det kan søkast om utgiftsdekking til låtskrivar¬samling for norske og internasjonale låtskrivarar og produsentar, som skriv i samarbeid for tredjepart med sikte på internasjonale plasseringar. Samlinga må finne stad i Noreg.
Det kan søkast om tilskot til delfinansiering av reise og overnatting for dei internasjonale deltakarane, samt in-house arbeidsutgifter (maks. 15 % av søkesum).
Kven kan søke?
Verksemder som skal arrangere, koordinere og gjennomføre arrangement i Noreg, der målet er å promotere norsk musikk overfor internasjonal musikkbransje eller internasjonale medium.
Søkar må vere norsk statsborgar eller busett i Noreg, og vere registrert i føretaksregisteret.
