BarentsKult

BarentsKult er Barentssekretariatet sitt program retta mot profesjonelle kunst- og kulturaktørar som ønsker å samarbeide med kollegaer nord i Sverige og Finland. Programmet skal stimulere til at det blir skapt nye kulturuttrykk gjennom internasjonalt samarbeid. Prosjekta som får innvilga stønad skal føregå i nord, og målet er å bidra til å skape gode lokalsamfunn i Nord-Noreg.

Kven kan søke?

Søkar må bu og jobbe i Nord-Noreg eller Sør-Sampi, og må ha ein samarbeidspartnar i Nord-Sverige, Nord-Finland eller frå begge landa. I tillegg kan ein ha med samarbeidspartnarar frå resten av Noreg.

Dersom søkar har eit relevant prosjekt, kan partnaren også vere frå andre nordlege Norden (Færøyane, Island og Grønland), eller arktiske område i Canada og USA.
Ordninga omfattar også samarbeid med uavhengige russiske aktørar i Barentsregionen.

For å få stønad må norske og utanlandske kunstnarar skape noko nytt saman gjennom prosjektet; for eksempel ei ny teater- eller danseførestilling, ny musikk, ei felles kunstutstilling eller andre kulturuttrykk.

BarentsKult kan dekke inntil 70 prosent av prosjektkostnadene knytt til nordnorske partnarar og deltakarar, eller partnarar frå Sør-Sápmi.