Innrapportering og tilskot i samband med slakting av rein

Den som først kjøper råvara frå reineigar, skal rapportere om slakta rein og lagerbehaldning til Landbruksdirektoratet.
Den som rapporterer om slakta rein, kan òg søkje om tilskot til rapportering og tilskot til frakt av rein i samband med slakting.

Slaktejournalen kan sendast inn med all informasjon i ei innsending seinast to veker etter utgangen av månaden slaktinga er gjennomført. Alternativt kan du sende inn i inntil tre omgangar:

1. Slaktejournal (utan pris- og eigarinformasjon) må lastast opp seinast to veker etter utgangen av slaktemånaden, altså seinast den 14. i påfølgjande månad.
2. Prisrapportering inkludert fødselsnummer til reineigar må lastast opp seinast to månader etter utgangen av månaden slaktinga er gjennomført. Merk at rapporteringsfristen for slakting i mars er 30. april.
3. Rapportering av fraktopplysningar må lastast opp seinast tre månader etter at fraktoppdraget er utført.

Lagerbehaldning skal rapporterast seinast innan to veker etter utgangen av månaden slaktinga er gjennomført. Dersom du har lager i månader det ikkje blir slakta, skal dette òg rapporterast – då rapporterer du 0 kg på dei ulike stykningsdelane.

For å rapportere og sende inn søknad på vegne av eit føretak, må du enten ha tilgang til enkeltteneste som gir tilgang til eit spesifikt skjema, eller ha Altinn-rolla «primærnæring og næringsmiddel». Personar med denne tilgangen eller rolla vil ha tilgang til å rapportere reinslakt og lagerbehaldning på vegne av føretaket ditt, samt kunne søkje om tilskot til rapportering av slakta rein og tilskot til frakt av rein i samband med slakting.
Vedkomande vil òg ha tilgang til å sjå føretaket si rapporterings- og søknadshistorikk.

Du finn beskriving av korleis du delegerer tilgangar og roller på Altinn.