Tilskotsordning for internasjonale kunsthandverksprosjekt
For profesjonelle aktørar i kunsthandverksfeltet som skal delta i internasjonale prosjekt.
Målet med ordninga er å gi profesjonelle utøvarar og fagpersonar innan kunsthandverket og duodji fleire internasjonale moglegheiter og breiare internasjonal kontaktflate. Ordninga skal bidra til å internasjonalisere kunsthandverk og duodji frå Noreg ved å opne for auka dialog, samarbeid og kunnskapsutveksling på tvers av landegrenser.
Kva kan du søke stønad til?
- frakt, emballasje og forsikring av kunsthandverk
- formidlingsmateriell (fysiske og/eller digitale publikasjonar, filmar og foto) som har som formål å fremje norsk kunsthandverk/duodji internasjonalt
- deltakaravgift/leige av utstillingslokale på utstillingar og messer
- reise og opphald/diett i tilfelle der søkar har ei aktiv rolle
- materialkostnadar for produksjon av nye verk
- materialkostnadar for produksjon av utstillingsmateriell- og arkitektur
Kven kan søke?
Aktive kunsthandverkarar, materialbaserte kunstnarar eller duojárat. Det blir primært gitt tilskot til kunstnarar med profesjonsutdanning. Det kan unntaksvis bli gitt tilskot til studentar basert på ei kunstfagleg vurdering. Kuratorar og skribentar/kritikarar som dekker kunsthandverksfeltet, kan også vere omfatta av ordninga når dei deltar med ei aktiv rolle på internasjonale seminar og liknande. Søkar må vere norsk statsborgar eller busett i Noreg, og prosjektet må realiserast i utlandet.
Tilskotsordninga er finansiert av Utanriksdepartementet og blir administrert av Norwegian Crafts. Ordninga har ei økonomisk ramme på 1 200 000 kroner årleg, og søknadsfristane er 15. februar, 15. mai og 15. oktober kvart år.
