Nye Altinn – enklare, tryggare og meir moderne

Kva blir betre for deg som brukar Altinn?

• Enklare å bruke: Tydleg design, enklare språk og mobilvenleg løysing.
• Betre oversikt over meldingar: Innboks som samlar brev, varsel og kvitteringar, og viser kven som har lese meldingane og om ei sak er under arbeid.
• Tryggare og sikrare: Personopplysningane dine blir verna på ei moderne plattform som er betre rusta mot digitale truslar.
• Systemtilgang og integrasjon: Fagsystemleverandørar kan ta i bruk systemtilgangar for å kople fagsystem til tenester i Altinn, slik at du som sluttbrukar får tryggare og meir stabile integrasjonar utan bruk av personlege innloggingar.
• Open kjeldekode og samskaping: Offentlege etatar kan byggje løysingar som blir delte og gjenbrukte, og raskare utvikle nye tenester som møter reelle behov.

Korleis lanserer vi endringane?

Sidan Altinn blir brukt av mange offentlege verksemder og alt må fungere saman, blir endringane rulla ut gradvis. Du kan difor oppleve at nokre funksjonar manglar eller ser annleis ut i starten. Sjå på det som eit puslespel: I byrjinga ser ein berre enkelte brikker, men bit for bit kjem heilskapen på plass.

Som ein del av vår smidige måte å jobbe på, får du prøve nye versjonar av løysinga undervegs. Denne hausten vil vi lansere den første versjonen av mellom anna innboks og systemtilgang. Du vil kunne ta i bruk den nye innboksen, og dagens innboks vil framleis vere tilgjengeleg i overgangsperioden før alt innhald er flytta over. Systemtilgang er ny funksjonalitet som blir tilgjengeleg for rekneskapsbyrå, revisjonsselskap og andre verksemder som ønskjer å kople fagsystem direkte til tenester i Altinn.

Kva må eg gjere?

Du treng ikkje gjere noko no. Du får beskjed når det er noko du må gjere.

Takk for tolmodet

Vi gler oss til å vise deg nye Altinn og set stor pris på tolmodet ditt medan vi byggjer om. Har du spørsmål eller tilbakemeldingar, kontakt oss på support@altinn.no