Nye Altinn – enklare, tryggare og meir moderne
Mange vil nok leggja merke til at enkelte delar av løysinga er merkte med eit «beta»-ikon. Dette betyr at funksjonaliteten framleis er under utvikling og vil bli vidareutvikla i tida framover. Dette er ein viktig del av den smidige arbeidsforma vår og bidreg til at me kan forbetra løysinga raskare og med høgare treffsikkerheit.
Ved å synleggjera at noko er i beta ønskjer me å vera opne om at delar av løysinga ikkje er heilt komplett enno, samtidig som me inviterer brukarane til å testa, utforska og gi innspel. Du kan naturlegvis lite på at den nye løysinga er like sikker som den gamle.
Den gamle løysinga er framleis tilgjengeleg, og kan (og i nokre tilfelle må) brukast dersom du ikkje får gjort det du ønskjer i ny løysing enno. Ved lansering er det ikkje noko du berre kan gjera i ny løysing, men tenester som krev at ein bruker den nye løysinga vil gradvis rullast ut fram mot at gamle Altinn blir avvikla i juni 2026.
Dette er nytt frå 1. desember
Tydelegare og meir moderne design
Eit oppdatert og meir gjenkjenneleg brukargrensesnitt, enklare språk og ei mobiltilpassa løysing gjer det lettare for brukarane å navigera i Altinn.
Betre oversikt over meldingar
I den nye innboksen samlast meldingar, varsel og kvitteringar i éin dialog med tydeleg status. Dette gir brukarane betre oversikt og gjer det enklare å sjå kva som krev oppfølging, og kva som er ferdig eller framleis går føre seg.
Meir brukarvennleg profilside
Nye profilinnstillingar gir brukarane betre oversikt og kontroll over varslar, varslingsadresser, kontaktinformasjon, favorittar og aktørar.
Nytt brukargrensesnitt for tilgangsstyring og delegering
Tilgangsstyring er redesigna for å bli meir oversiktleg og enklare å administrera – i første omgang for verksemder.
Tilgangspakkar for verksemder
Ei erstatning for dei gamle Altinn II-rollene. Fleire pakkar med tydelegare temainndeling, som grunnlag for meir treffsikker tilgangsstyring.
Systemtilgangar og integrasjonar
Fagsystemleverandører kan ta i bruk systemtilgangar for å kopla fagsystem til Altinn-tenester utan bruk av personlege innloggingar. Dette gir meir stabile og sikre integrasjonar for brukarane.
Nye hjelpesider og ny navigasjon
Informasjonsportalen møter brukarane med ein ny, global navigasjon (headar, søk og meny) som finst øvst på sida. Innhaldet er i stor grad det same som før, men presentert i ein ny og meir intuitiv drakt. Det er også utvikla nye hjelpesider som dekkjer både den nye og gamle løysinga.
Les meir om endringane i tilgangsstyring.
Ein overgangsperiode
I tida framover vil både den gamle og den nye løysinga vera i bruk. Den nye innboksen viser ved lansering meldingar og innsende skjema daterte frå og med januar 2025, medan eldre meldingar og Altinn II-skjema under arbeid framleis berre er tilgjengelege i den gamle innboksen.
Det same gjeld tilgangsstyring: Fleire viktige funksjonar er allereie på plass i den nye løysinga, men ein er framleis avhengig av Altinn II om ein skal gjera følgjande:
- Gi tilgang til enkelttenester
- Behandle tilgangsførespurnader (frå «Be om tilgang»-funksjonaliteten)
- Gi tilgang til tenester som enno ikkje er kopla mot ein eller fleire av dei nye tilgangspakkane (bruka Altinn II-rollene).
Takk for tolmodet
Vi gler oss til å visa deg nye Altinn og set stor pris på tolmodet ditt medan me byggjer om. Har du spørsmål eller tilbakemeldingar, kontakt oss på support@altinn.no